MBOWE ANUSURIKA KIFO, NI BAADA YA BOMU KULIPUKA UWANJA WA SOWETO ALIPOKUWA AKIMNADI MGOMBEA UDIWANI WA CHADEMA, WAWILI WAFARIKI DUNIA, 15 WAJERUHIWA VIBAYA ,

Na Mwandishi wetu, TANZANIASASA 

VIONGOZI waandamizi wa chama cha demokrasia na maendeleo (CHADEMA) akiwemo Mwenyekiti wa chama hicho Freeman Mbowe jana walinusurika kufa baada ya kitu kinachosadikiwa kuwa ni bomu kulipuka kutokea chini ya Jukwaa alilokuwa akihutubia katika uwanja wa Soweto muda mfupi baada ya kumaliza kumnadi mgombea udiwani wa kata ya Kaloleni Emanuel Lewi Kessy jijini hapa.

Mbali ya hilo pia kumekuwepo na madai ya watu watatu kufariki dunia na wengine zaidi ya 15 kujeruhiwa sehemu mbalimbali za miili yao ikiwemo miguuni na kichwani  ikiwemo watoto wawili waliodaiwa kuvunjia miguu.

Tanzaniasasa ilishuhudia majeruhi hao wakiingizwa na kutolewa katika hospitali ya Mount Meru mara baada ya kutokea kwa tukio hilo lililotokea saa 11.40 muda mfupi baada ya Mwenyekiti wa CHADEMA Mbowe kumaliza kuhutubia wananchi wa kata hiyo na kumuombea kura mgombea huyo.

Katika hospitali ya Mount Meru umati mkubwa wa wafuasi wa CHADEMA ulifurika muda mfupi baada ya kutokea kwa tukio hilo ambao wengi wao walionekana kushinikiza wauguzi wachache waliokuwepo hospitalini hapo kuwapatia majeruhi huduma ya kwanza kufuatia kujeruhiwa vibaya katika maeneo mbalimbali ya miili yao.

Zoezi zima la kushinikiza wauguzi hao kuwapatia huduma majeruhi hao liligeuka baada ya baadhi ya wauguzi kujificha wakiogopa umati huo wa wafuasi wa wachadema na hivyo majeruhi kukosa huduma ya kwanza.

Hali hiyo iliwalazimu wafuasi wa CHADEMA kubeba majeruhi hao waliokuwa wakivuja damu katika miili yao kwa kutumia magari binafsi na kuwahamishia hospitali mbalimbali ikiwemo hospitali ya rufaa ya Kanis

la Kiinjili la Kilutheri ya Seliani ya jijini hapa.

Mmoja wa wafuasi wa chadema aliyejitambulisha kwa jina la Martin Lucas alidai wakiwa katika uwanja wa Soweto huku mkutano ukiendelea kwa amani na utulivu na mwenyekiti wa Chadema alipomaliza kuhutubia na kushuka jukwaani akielekea kupanda gari lake tayari kuondoka, ghafla mlipuko mkubwa ulitokea katika jukwaa alilokuwa akihutubia.

“ Ndugu mwandishi hii ni hujuma kabisa, Mkutano ulifanyika kwa amani na utulivu wa kutosha ghafla tukashangaa watu wanaanguka chini huku moshi mkubwa ukipaa juu,  sisi tulikuwa pembeni ya mti tukafikiri Mwenyekiti wetu amepigwa bomu lakini haikuwa hivyo, yeye alishapanda gari na kuanza safari, watu wengi wameumia sana ndugu yangu,”alisema mfuasi huyo Robert Kinabo.

Mbali ya Mwenyekiti huyo wa CHADEMA kunusurika kwa bomu katika mlipuko huo mwingine ni pamoja na Mbunge wa Arusha mjini Godbless Lema ambae kwa kipindi chote cha kampeni za Chadema alikuwepo jijini Arusha akiwanadi wagombea wa udiwani wa chama hicho.

Kamanda wa Polisi Mkoa wa Arusha Liberatus Sabas alithibitisha kutokea kwa tukio hilo pamoja na vifo vya watu wawili na kusema kuwa jeshi hilo linaendelea na uchunguzi zaidi ili kubaini watu zaidi waliathirika katika tukio hilo.

 

Wafuasi wa CHADEMA wakimbeba majeruhi wa tukio la kupigwa bomu katika uwanja wa Soweto leo kutoka hospitali ya Mountmeru baada ya kukosa huduma

Wafuasi wa Chadema wakiwa wamembeba mtoto mdogo aliyejeruhiwa katika tukio hilo kumtoa katika hospitali ya Mount Meru na kumwamishia hospitali zingine za binafsi baada ya kukosa huduma

Mtoto mdogo ambae jina lake halikuweza kupatikana mara moja akiwa amelazwa hospitali ya Mount meru baada ya kujeruhiwa na kitu kinachosadikiwa kuwa ni bomu wakati wa kufungwa kwa kampeni za chadema kuwania kiti cha udiwani kata ya Kaloleni

Wauguzi wachache katika hospitali ya Mkoa wa Arusha Mount Meru wakiwapatia huduma ya kwanza majeruhi , kulia ni mmoja wa majeruhi mtoto mdogo akipewa oxygen

Wafuasi wa chadema wakiwa wamejazana ndani ya hospitali ya Mount Meru wakishinikiza majeruhi kupatiwa huduma

Majeruhi mama mwenye mtoto mdogo wakitoka ndani ya hospitali ya Mount Meru wakisubiri kupakiwa kwenye magari kuhamishiwa hospitali zingine binafsi baada ya kukosa huduma

Gari lenye bendera za chadema likiondoka kwa kasi kutoka hospitali ya Mount Meru baada ya kupakia majeruhi waliokosa huduma na kuwawahisha hospitali binafsi

Majeruhi

Majeruhi akiwa amelazwa katika korido huku akisubiri huduma zaidi

Wafuasi wa Chadema wakiwa wametanda nje ya hospitali ya Mount meru

Majeruhi akisubiri huduma katika hospitali ya Mkoa wa Arusha Mount meru